Fründe
Ich han würkli es paar sehr sehr gueti Fründe
wo mir täglich mailed zum mir fürsorglich verkünde
wenn mer im e Wettbewerb chan Millione günne
oder wo's e geili Webside git mit füdliblutte Nonne
Sie kenned s' bescht Aagebot für Replica-Uhre
Büüted Software fasch gratis a und sueched Investore
für ihri Bouprojekt in Prag und uf Mallorca
und sie wüssed dass i Viagra bruuch zum es richtigs Rohr ha
Ich han würkli es paar sehr sehr gueti Fründe
Ich han würkli es paar sehr sehr gueti Fründe
Hey - Ich han würkli es paar sehr sehr gueti Fründe
die fülled mer de Briefchaschte us ehrewerte Gründe
Sie wüssed dass de Chleber nur isch zum de Chaschte schmücke
und dass ich jedesmal juchze vor Entzücke
über de Prospekt mit de schönschte und gschidschte
Gsichter im Land und em Hiiwis uf d'Lischte
woni dene ihri Näme muess hiischribe
wenn i wott dass mer neutral und unabhängig bliibed
Ich han würkli es paar sehr sehr gueti Fründe
Ich han würkli es paar sehr sehr gueti Fründe
Au ich han würkli es paar sehr sehr gueti Fründe
die quatsched mi am Bellevue a wänd mich vo mine Sünde
erlöse und vom Böse beschütze und bewahre
Sie warned mi vor all dene unsichtbare Gfahre
wo eim ständig uuflured in Form vo de Verfüehrig
dur weltlichi Glüscht und mit re gwüssre Rüerig
nimm ich zur Kenntnis dass sie mir es Büechli wänd schenke
wo mir helfe wird mini Seel is Paradies z'lenke
Ich han würkli es paar sehr sehr gueti Fründe
Ich han würkli es paar sehr sehr gueti Fründe
Gueti Fründe muemer pflege, die sind zimlich selte
drum tüend mir ihne ihri Selbschtlosigkeit vergelte
persönlich und vo Herze tüend mir eus jewils bedanke
für jedes Mail, jede Prospekt und die wertvolle Gedanke
und will das nonig gnueg isch für das wo sie eus gebed
und mir ihne möchted zeige wie mir's gnüsse dass sie läbed
hämmer all die wunderbare liebenswerte Lüüt
zun're Party iiglade, und die Party die isch hüt!
