Gedankezerstörer
ich han all die verfluechte Gedanke a dich
us mim Chopf usepresst und ines Couvert dri ta
has weg gschickt wiit weg aber drü Tag später
s Couvert wieder im Briefchaschte gha
mit em Hiiwiis verseh es seig nöd gnueg höch frankiert
also bin i uf d Poscht und ha mi det informiert
sie händ min Brief gwoge und sehr überrascht
gseit: "All Marke vo de Welt langed nöd für die Lascht"
Han die Gedanke a dich mit Draht umwicklet
und han es paar schweri Stei dra ghenkt
bin an Bürkliplatz gfahre han es Pedalo klaut
und han di ganz Fuer zmittst im Zürisee versenkt
Spaht i de Nacht verschwitzt und erschöpft
bin i hei cho und han en Schampus gchöpft
endli erlöst han i es Bad iiglaa
und nöd dra denkt dass i s Wasser vom Zürisee ha
Has inen Felsspalt dri zwängt und mit Beton übergosse
has mit Dynamit gsprengt und mit Granate druf gschosse
has i Süüri ufglöst mit Füür und Flamme probiert
doch nüt vo all dem hät funktioniert
drum träg i die verfluechte Gedanke a dich
immer no mit mir ume und s wär würkli hilfrich
wenn öpper vo oi da une im Saal
sie mir chönt abnäh wie isch egal...
