Horrorskop
Es staht alles i de Sterne vo Afang a
Öb du de Schoppe akzeptiersch oder s Mami muesch ha
Öb du s 1x1 kapiersch oder i d' Nachhilf muesch gah
Es staht alles i de Sterne vo Afang a
Alles i de Sterne
Wenn sie eso nen widerliche Widder sind
staht de Neptun hüt wieder guet für d Erziehig vo de Chind
ohni Znacht is Bett und vorher es paar an Grind
wenn sie eso nen widerliche Widder sind
Als Rind - das heisst als Stier - müend sie de Grind nöd immer durestiere
Tüend sie s riskiere und statt eme stiere Bier mal öppis härts probiere
e Linie zieh und ohni sich z' ziere uf allne Viere tüüf inhaliere
mit em Mars im erschte Huus chan da nöd viel passiere
bim Rassiere entdeckt de Zwilling hüt sis erschti graui Haar au
d' Krebsfrau erlebt en Super-Gau in Aarau
De Leu isch ihre nöd treu - er isch uf em Sprung - gnau
hüt triebt er s im Heu die Sau mit Eiger Mönch und Jungfrau
Es staht alles i de Sterne jede einzeln Schritt
öb d gern Kaffi ohni Milch häsch oder lieber mit
öb d im Bett en alte Knilch häsch oder de Brad Pitt
Es staht alles i de Sterne Baby jede einzeln Schritt
Alles i de Sterne
Als Waag sötted sie mit ihrem Wage mal öppis wage
und sich für eimal nöd mit Tempolimite plage
mit hundertfüfzg i d Fuessgängezone ine sage
dank em Mond im grosse Wage stellt mer de Waage hüt kei Frage
Gönd sie über Leiche und sind sie im Zeiche vom Schütz gebore
händ de Job verlore und de Direktore Rache gschwore
mit em Sturmgwehr vo vore zieled sie gnau zwüsched d Ohre
will sie sind ja schliesslich als Schütz gebore
E super Konstellation am Himmel hät de Skorpion-Maa
er muess für d' Kopulation usnahmswiis nöd in Salon gah
uf de Steibock de geil Bock werded d' Fraue defür kei Bock ha
und de Wasserrmaa wird hüt bim Wasserlaa en Schock ha
Es staht alles i de Sterne komplett und lückelos
Öb in Gstaad e Villa chaufsch oder en Chuestall in Davos
Öb din Sohn Godzilla taufsch oder wie i de Bible Mos-
es staht alles i de Sterne komplett und lückelos
Alles i de Sterne
Wenn du eso wien er en chline miese fiese Fisch bisch
dänn isch Ziit dass du de Löffel jetzt solidarisch abgisch
Stell di uf en Tisch und nimm en Strick wo frisch isch
denn für Fisch isch astrologisch hüt en Abgang charakteristisch
Es staht alles i de Sterne bis ganz am Schluss
öb du dur en Feind verrate wirsch oder dur en Kuss
öb du under es Tram grate wirsch oder under en Bus
Es staht alles i de Sterne bis ganz am Schluss
Alles i de Sterne
Öb du de Schoppe akzeptiersch oder s Mami muesch ha
Öb du s 1x1 kapiersch oder i d Nachhilf muesch gah
Öb d' gern Kaffi ohni Milch häsch oder lieber mit
Öb d im Bett en alte Knilch häsch oder de Brad Pitt
Öb in Gstaad e Villa chaufsch oder en Chuestall in Davos
Öb dini Band Vanilla Taufsch oder Guns and Ros-
es staht alles i de Sterne alles i de Sterne
Öb du dur en Feind verrate wirsch oder dur en Kuss
Öb du vom e Ami brate wirsch oder vom e Russ
es staht alles i de Sterne
