Rosmarie
hät nüd mit de Wahret z'tue
Entgege allne Grücht bin ich ganz en liebe Cheib
und la dich sicher bald wieder in Rue
Kei Angscht Rosmarie es isch all's ganz andersch gsi
als mer eu wissmache wott
D'Bewiisstück sind all gfälscht und ghöret wie d'Uussage au
zume gross agleite Komplott
Ich weiss es git schints Lüüt wo unter Eid bezüge tüend
dass sie mich i dere Nacht bim Fluss gseh händ
wo anschinend mini Gartehändsche gfunde worde sind
nebem Chopf vom Schulpflegspräsident
Kei Angscht Rosmarie dass Messer a dim Hals
söll bloss e Drohig sii
Und wenn d' schön ruhig bliibsch bis mer dusse sind denn isch beschtefalls
in're Stund scho alles verbii
Ich weiss es heisst im Gmeindrat heigs sit langem scho Krach gäh
und all händ gwüsst vo ihm und miner Frau
Doch dass ich zu sonre Tat niemals fähig wär
weisch du doch ganz genau
Kei Angscht Rosmarie die schüssed sicher nöd
solang du vor mir stahsch
und s isch doch sicher au i dim Sinn wenn du jetzt da als erschts
dur die Türe use gasch
De Richter hät zwar gseit ich seigi unberechebar
und für so ne skrupellosi Greueltat
sind lebenslänglich mindeschtens 115 Jahr
z'wenig wenns nach ihm gaht
Kei Angscht Rosmarie, s tuet sicher bald nüm weh
und d' Sanität isch au gli da
Und als Troscht für all das Ungmach wo d'häsch müesse uf dich neh
gits jetzt zum Schluss noch chli Harmonika
