Nomal s’Gliich, Nomal s’Gliich           

Nomal s’Gliich, Nomal s’Gliich

 

Ich het zwar im 3. Programm vill lieber öpis ganz anders gmacht

So im Stil vom Paul Simon mit total villne Maj7-Akkörd

Oder mit Schlagzüg und verzerrte Gitarre, dass es chlöpft und tätscht und kracht

Aber de Roman hät gfunde, dass mer das im Theater nöd goutiere wörd

Ich hät eu gern es Programm, wo de ganz Abig nie glacht wird präsentiert              

Und usschliesslich mini Depressione und s’Leid i de Welt thematisiert

Aber s’Management hät gmeint dass das kei Sau int’ressiert – drum                       

 

Nomal s’Gliich, Nomal s’Gliich

Denn machemer jetzt halt nomal s’Gliich

 

Wie gseit, wenn’s nach mir gange wär, wär ken Stei uf em andere blibe                       

Aber im ne Trio häsch eifach ke Chance so ganz ellei

Ich het es Konzeptalbum a la „The Wall“ vo de Pink Floyd gschribe

Aber de Christian hät gseit, er seig ehner für „Ewigi Liebi 2“ 

Ich het euses Konzept au gern personell revolutioniert

Und zu dem Zweck bi Heinz de Specht zwei drü nöi Musiker integriert

Aber de Dani hät gschtört dass sich denn eusi Gage halbiert – drum

 

Nomal s’Gliich, Nomal s’Gliich

Wenigschtens werd e mer so langsam riich

Nomal s’Gliich, Nomal s’Gliich

Denn machemer jetzt halt nomal s’Gliich

  

Drüviertelstund Liedli singe und nach de Pause nomal Drüviertelstund           

Solo, im Duett oder mit schöne drüstimmige Gsäng

Uf möglichscht villne Instument spille damt ihr gsend, wie vielsiitig mir sind

Und eu mängisch verschrecke mit Liecht - und mit Gschrei und Päng

Wie immer gits schwiizerdütschi Tegscht won ich eu d’Welt demit erchlär

Witzig, tüüfsinnig und mängisch au es Bitzeli vulgär

Und mir tüend wie wenn das fü öis immer no total spannend wär –

 

Nomal s’Gliich, Nomal s’Gliich

Wer lost denn i dere Band scho uuf mich?

Nomal s’Gliich, Nomal s’Gliich

Jetzt machemer halt nomal s’Gliich

 

Böuel

Bi eus uf em Land – bi eus uf em Land

Bi eus uf em Land – bi eus uf em Land

 

Bi eus uf em Land, da isch alles no wie früehner           

De Stall volle Chüe und de Garte voll Hüehner

Bi eus uf em Land  – chasch mer’s glaube - da staht

D’Chille no im Dorf und s’ Maggi neb em Aromat

bi eus uf em Land hockt me z Obig i de Beize

und de Hanf wachst bi eus zwüsched Mais und Weize

Bi eus uf em Land chasch nume rechti Schwiizer finde

will alles was eus stört, lönd mir im Bschüttiloch verschwinde

 

Bi eus uf em Land – bi eus uf em Land …

 

Bi eus uf em Land, da isch d’Welt no in ornig

D Frau staht am Herd und de Herrgott isch no zornig

Bi eus uf em Land, da werdet d Schöfli no gschore

Und wenn de Bueb nöd esse wott, denn git’s e paar a d Ohre

Bi eus uf em Land melcht de Buur nöd nume d Chüeli

er brucht d Maschine au für sich und gnüüst das uf sim Stüehli

Bi eus uf em Land, da wird no hemmigslos glacht

Wemmer Witzli über Sex mit de Melchmaschine macht

 

Bi eus uf em Land – bi eus uf em Land …

 

Bi eus uf em Land gisch alles für din Papi

Bi eus uf em Land gisch alles für dis Mami

Und mängisch git’s defür es Redli vom Salami

So isch das bi eus uf em Land Gopferdami!

 

Walti

Vater, Hey Vater, jetzt druck endli ab           

Mer riist nöd zersch s’Muul uf und macht nachher schlapp          

Das häsch du mir jedefalls immer so gseit            

Also los Vater Schüss, ich bin bereit!           

 

Vater hey Vater was zittrisch jetzt so?           

Hetsch dich halt gschiider wie all ander da           

So benoh wiemer vom Gsetz her müesst           

Hetsch d’ Schnurre zue ghebt und de Huet eifach grüesst           

 

Vater, ja Vater nume will du es            

Autoritätsproblem häsch stahn ich jetzt blöd da                          

Mit dem Öpfel uf em Grind und s’ ganzi Dorf lacht            

Debi hät doch de Vogt so vill Guets für eus gmacht          

         

Er hät all Bäre und Wölf im Tal gschosse        

Hät d’Handelsweg über d’Alpe erschlosse                 

Dank im chammer s’Wasser vom Brunne jetzt trinke

Und im Dorf tuet jetzt nüme so stinke

Sit er eus beschützt werded kei Chüe meh gstolle

Und s’Salz müemmer nümme uf Züri go holle

Er hät Schuele, Spitäler und Spilplätz la boue

Und z’Nacht chönd sich d’Fraue uf d’Strass use troue

Er hät Schnitzel us Wien bracht und Linzerturte und           

Hellebarde für d’ Schlacht bi Murte – Ja            

So en Güetige Ma!           

           

Vater Hey Vater, jetzt mach scho und ziil           

Aber bitte vergiss das mit em zweite Pfiil                                     

Ich wott doch nöd nume will du s nöd chasch la

Als Terrorischtesohn i d'Gschicht i gah

 

Nietzsche

de Urs de hät es iPhone, wo cha choche                                               

und Gaby hät es App, wo d Wösch ufhenkt                       

de Murat hät uf Facebook am Gökhan d Nase broche                       

und d’Vanessa hät es Tool, wo Liebi schenkt                                   

                                                                                                           

de Reto hät en Goldfisch, wo cha pfiife                                               

und d’Andrea hät en Hund, de macht „miau“                                                

s’Ross vom Peter, das cha Nietzsche, Kant und Freud begriife                       

und de Rolf isch jetz e Frau und cha das au                                               

 

ich ha nur e Züschte                                                                          

und ich sött go Rüebli rüschte                                    

doch ich stah in Willisau no i dem Stau           

 

Omen

Ich han kei Ahnig was das söll           

Nei ich bin würkli irritiert           

Will um mich ume immer wieder -             

so komischs Züg passiert           

 

Ich weiss nöd wenn und au nöd wie           

Will’s sich nöd vorhersäge laht            

Au wo’s passiert, dass weiss i nie             

Biispilswiis im Hallebad           

 

Isch mir e Walross-Frau x Mal           

Bim Crawle blöd i d’ Queri cho            

Churz druf hät sie s’ Personal           

Als Wasserliich zum Bad uusgno           

 

Oder sievo obedra

Wo über's Parkett stampft die halb Nacht

Hät uf z’Mal am Tag denah

En Chöpfler ab em Balkon gmacht

 

Ich han kei Ahnig was das söll

Nei ich bin würkli irritiert

Will um mich ume immer wieder - 

so komischs Züg passiert

 

De läschtig Blitzliecht-Fotograf

- ich glaub s’ Lokalblatt het en gschickt -

De isch ganz plötzlich und ganz brav

Am ne Mikrofon verstickt

 

Em Chellner wo mi ignoriert hät

Isch es Rechaud explodiert

Die wo s ganz Abteil okkupiert hät

Isch mit de S-Bahn kollidiert           

 

Ich han kei Ahnig was das söll           

Nei ich bin würkli irritiert           

Will um mich ume immer wieder -             

so komischs Züg passiert                       

 

Es wär glaub guet eu z’informiere           

Was ihn susch no hässig macht           

denn chönd ihr eu druf konzentriere           

Dass nüt Dumms passiert hüt Nacht           

 

Mängisch gnüegt’s, wenn ihr z’ luut lached           

- oder a de falsche Stell           

au wenn ihr selber Witzli mached           

nerved ihr ihn eventuell           

 

Wenn da ine diskutiert wird           

oder ihr wänd zmitzt drin ga            

Wenn ständig s Handy kontrolliert wird           

Schiisst ihn das wahrschindli a           

 

Du sötsch uf kenn Fall rhythmisch klatsche           

Und au luut mitsinge wär dumm           

Gahn ihn ja nöd go betatsche            

           

usser du gsehsch us wie d’Heidi Klum           

Oder so wie d’ Sophie Marceau in La Boum

 

Hypothetisch 

Kommuniqué zum Programm-Loch:

Liebes Publikum hier in XY, sehr geehrte Vertreter der Presse,

wir von Heinz de Specht wurden von diversen Veranstaltern, unseren zahlreichen Sponsoren sowie von unserem Management mehrfach darauf hingewiesen, dass laut Kleinkunstparagraph 4b, Abschnitt 12 – wir zitieren „im Verlaufe eines Liederabends spätestens nach 20 Minuten der direkte Kontakt zum Publikum aktiv hergestellt werden muss.“ Zitat Ende.

 

Trotz zermürbender Diskussionen und redlichem Bemühen ist es uns bisher nicht geglückt, eine geeignete künstlerische Lösung hierfür zu finden. Wir bitten Sie um Nachsicht und Verständnis für das deshalb an dieser Stelle entstehende Loch im Programm.

villicht müesst’ me au da es Lied mache                       

wo das Loch im Programm stopfe tuet           

und wie meischtens bi söttige Sache                       

chämt’s im Mani Matter-Stil sicher recht guet …                       

           

am Beschte wär s’Lied acapella                       

und mir chönted singend die Bühni verlah                       

im Publikum gängti denn s’Liecht a                                    

und mir würded zmitzt i de Lüt ine stah                                   

 

und det Händli ga schüttle, de Lüt in Arsch chrüche

und säge: „Schön, sind ihr da“

erfahrigsgmäss chönti so s’Iis langsam schmelze

und au di gwünscht Nöchi entstah

 

und denn würded d’Lüt klatsche, nur will mir ganz kuhl

würded da stah und pose im Liecht –                                               

und fändet’s toll, wenn eine vo eus mit’re Sprützpischtole

e chli Action miecht

 

wenn’s denn no Konfetti würd rägne und Seifeblase           

wär Stimmig im Saal garantiert                                   

und sogar (-) d’Arbet vom [Gögs hind’rem] Mischpult

würd mit’ere Welle goutiert                                               

 

jaaa, d’Veranstalter, s’Management und d’Sponsore           

sie all wäred glücklich und froh                                                           

wenn’s a dere Stell so öppis gäbt                                               

und das Loch i dem Programm denn nüme würd cho 

 

Schwertwal

Ich han en Schwertwal i de Stube           

sit em Ziischtig hockt de deht            

er gaht vom Sofa bis zum Fernseh           

wenn er sich echli verdreht           

 

Er hät e gueti Figur, sini Mass sind ideal

Mit 90, 860 und 90 isch er en Modellwal

Und alles won er seit, wenn er mit mir red           

Isch: „Trenned gfälligscht Altglas und PET!“           

 

Wie gseit sit em Ziischtig hockt de eifach da

Blockiert de Weg zum Esstisch und wot nüme gah

Sini ruhig Art isch mini Inspiration

Mängisch ghört mer vo ihm e ganzi Stund lang ken Ton

 

Und wenn er denn irgendwenn doch/mal s’ Muul ufmacht           

Seit er nur: „Stell de Compi uus i de Nacht!“

             

Ich bin endli acho, mis Läbe hät en Sinn           

Sit ich in Gsellschaft vom e Meeressüger bin           

Und dene wo meined, dass seig alles nur Schund           

säg ich „s’git meh zwüsched Erde und em Ozeangrund           

als sich eui Schuelweisheit träume laht!“           

Und er seit: „Chaufed nume Saisonsalat!“           

 

Ich han en Orca i de Stube – so seit mer dene au

Und sit er da vor em Fernseh hockt, vermiss ich mini Frau

Ich wot mim Gascht ja würkli gar nüd Böses unterstelle

villicht hät er ja nur in Rue de Wahlkampf luege welle

Drum sprich ich ihn ganz vorsichtig druf aa und er seit:

„Sie hät Schlangeleder-Stiefel treit“

 

Ich han en Schwertwal i de Stube, sit em Ziischtig sitzt er deht

Und anschinend bin ich immer no de Einzig, wo nen gseht

Und drum verstah au nur ich ellei sini Wort

Will wenn mer ihn nöd will gseh, denn verstummt er sofort

Ihr händ ja kei Ahnig, was eu entgaht

Wenn er seit: „Heized nur uf 18 Grad!“

 

Will ich sini Weisheit offebare wott

Schriib ich jetzt es Buech mit all sine Gebot

Und ich bou em en Tempel, wo am IIgang gross staht

Dass nur is Paradies chunnt, wer mit em Velo hi gaht

 

Und euse heilig Tag söll de Ziischtig si

Und mir laded dich ii, stiig ii

Und find s'Glück im Sparlampe-Schii

 

Traumlied 

geschter bini z’Nacht am Drü ufgwacht i mim Bett                                     

ich ha träumt gha vom e Lied, wie-n-ich’s scho lang gern schribe wett           

de Text isch total packend gsi und irgendwie mit Witz                       

und d’Musig, die hät tönt, wie bi de allergröschte Hits                                   

ich ha no jedes Wort im Ohr und weiss d’Akkörd uf em Klavier

de Song da us mim Traum, de mues jetz sofort uf Papier                       

 

für so Fäll ha-n-ich so-nes chlises Büechli neb’em Bett                        

wo’s uf ganz vill leeri Site Platz für Lied-Idee hett                       

also tascht ich mich im Dunkle zu mim Nachttischlämpli hi           

und vo det am Kabel witer müest de Schalter neimet si                       

doch weder s’Lämplischalterkabel no mis Nachttischlämpli sind           

im Dunkle öppe det, wo söttet si, so dass ich’s find                                   

me sötti nie haschte – bim Taschte im Dunkle                                                                                                                                               

ich ha de Lämplischalter doch no gfunde a de Kabelschnur                       

doch jetz wo-n-ich chönnt schribe, fehlt vom Bleistift jedi Spur

uf de Suechi nach chli Liecht ha-n-ich vermuetlich us Verseh

mim Schriber mit em einte Arm es chlises Schüpfli geh

ich entdeck de Stift zmitzt und’rem Bett im Staub und mues drum so

total verchrüplet mit de Fingerspitz probiere anez’cho

 

da rutsch ich samt de Decki us em Nescht und weckt so mini Frau

wo’s nöd gern gseht, wenn ich z’Nacht s’Liecht amach und ihre d’Decki chlau

sie früürt nöd gern as Füdli und will wüsse, was das söll

und ich verzell vom träumte Lied, wo-n-ich sofort notiere wöll

und währendem ich in Erchlärigsnot um Wort am Ringe bin, merk ich           

vom Lied, wo-n-ich hüt träumt ha, chunnt mir gar nüt meh in Sinn           

ich chönnti raschte – ich taschte im Dunkle – ich taschte im Dunkle                                                           

inzwüsche isch es füf ab Drü und s’Lied isch würkli weg                                   

und s’fallt mer nüme-n-i, egal, wie fescht ich überlegg                                   

ich versuche witer z’träume, doch mit schlafe isch verbi                                   

und vo dem Traumlied isch nüt übrig, keis Wort, kei Melodie                                   

ich gang übere i d’Stube und ich hocke a s’Klavier                                   

villicht chunnt ja d’Erinn’rig zrugg, wenn ich dete chli probier                       

 

ich sueche jedi Tonart ab und fange a in C                                               

spil dürab im Quintezirkel bis Ces-Dur mit sibe b                       

irgendwo mue s’Lied versteckt si und als ob das öppis nütz                       

mach ich s’glichi Spiili nomol i de Tonarte mit Chrüz                       

will ich bis Fis-Dur nüt cha finde, laschtet alli Hoffnig voll           

uf sibe Chrüz Cis-Dur, respektive uf ais-Moll … ais-Moll            –                       

ich chönnti raschte – ich taschte im Dunkle uf de dunkle Taschte im Dunkle           

ich taschte uf de dunkle Taschte im Dunkle           

 

ich han erfolglos witer gsuecht no di ganzi Nacht

und bim Zmorge wird mer klar, ich ha vergebe düregmacht                       

jetz stuhn’ich selber über mini nächtlich Euphorie                                   

im Traum perfekti Lieder finde, wär zu traumhaft gsi                                   

was übrig blibt sind Augering und s’truurig Resümee                       

ich stah da mit leere Händ und ha kein Song und kei Idee 

 

Klon 

Du seisch ohni dich wär ich gar nöd da – das isch wahr           

Trotzdem het ich mini Niere gern bhalte gha und au mini Haar

Du seisch ich heig mit dir doch eigentlich Glück – das mag si

aber trotzdem vermiss ich vo Ziit zu Ziit mis bescht Stück – scho echli

 

Warum bin uusgrechnet ich en Klon?           

Warum bin uusgrechnet ich en Klon?           

Es Lebe als Ersatzteillager isch           

fasch schlimmer als wänn d’Fän vo Schlager bisch           

Warum bin uusgrechnet ich din Klon?           

 

Ich mach jedes mal i d’Hose wenn du es Bier trinksch

Und debi quasi scho minere Lebere winksch

Mini Lunge, mis Herz und min Kehlchopf – die brücht i eigentli no

Drum bitte her endli uuf mit Parisienne - und Marlboro

 

Warum bin uusgrechnet ich en Klon?

Warum bin uusgrechnet ich en Klon?

Wenn mer mich i mini Einzelteil

zerleit find ich das nur vereinzelt geil

Warum bin uusgrechnet ich din Klon?

 

 

Warum bin uusgrechnet ich en Klon?

Warum bin uusgrechnet ich en Klon?

Wenn du jedesmal wenn d’ der en Zeihe aschlasch

Mir grad es Bei amputiere lasch oder

Denn stah ich echt chli blöd da als Klon

 

Jetzt her e mal uuf mit dem Klön du Klon           

Jetzt her e mal uuf mit dem Klön

Jetzt her e mal uuf mit dem Klön du Klon           

Jetzt her e mal uuf mit dem Klön

 

Wemmer chlönendi Klone klont, isch das öpis wo sich nur selte lohnt           

Will en Klon wo chlöhnt isch bim Bsitzer verpönt

Will er ständig nur weg sim Klonschicksal stöhnt

Also kloned kei chlönendi Klon

und verschoned öis vom Geklön

vo de Klon

 

s'Nögschmal

mit Sibzehni bini voll uf d’Eva gschtande                       

ich ha sie gfrögt, öb sie as Züri Wescht wöll cho                       

ich glaub bi ihre hett ich chönne lande                                   

hett de Kuno sie nöd hinder d’Bühni gno                       

 

snögschmal machi’s besser                                               

snögschmal klappet’s scho                                               

snögschmal cha’s jetz nur no besser cho                       

 

mit de Bea bini drum zum Polo Hofer

de Pariser scho parat, falls es passiert

ha kei Ahnig gha, wie das so lauft als Lover

und hett d’Packigsbilag gschider mal studiert

           

snögschmal machi’s besser                                               

snögschmal klappet’s scho                                               

snögschmal cha’s jetz nur no besser cho           

 

churz druf abe bim’ne feine Znacht im Loie

hät sie’s mir verzellt und ich ha denkt: „Ou, shit!“

noch paar Mönet ha mi doch no afa freue

bis sie gseit hät, dass’ es Maitli git                       

 

snögschmal machi’s besser                                               

snögschmal klappet’s scho                                               

snögschmal cha’s jetz nur no besser cho           

 

sit de Hochzit isch mis Läbe voll zum Chotze

sie nörgelet de ganz Tag und ich bin

recht erstuunt, dass sie nur gähne mues bim Motze

nach zwölf Schlaftablette im Birchermüesli drin

 

snögschmal machi’s besser                                   

snögschmal klappet’s scho                                               

snögschmal machi’s denn zum Bischpil so …           

 

… dass ich Gin Tonic mische mit Strychnin                       

und Rattegift is Aspirin                                               

oder bin’re Wandrig stürzt sie halt                       

us Verseh in Gletscherspalt                                               

mer schlipft bim Nagle a de Wand                                   

de Hammer saublöd us de Hand                                   

und s’chönnt doch si, dass sie im Bett                                   

en Chettesägi-Unfall hett                                                           

wo-n-ich das denk, ligg ich im Bad                                                           

und merke, dass mis Herz nüm schlaht                                                

 

snögschmal mach is besser                                   

und zwar vo A bis Z                                               

snögschmal werd ich luege                                               

dass zerscht sie en Unfall hät                                   

snögschmal mach is besser                                   

und denn wird alles schön                                   

snögschtmal gump ich use                                               

wenn sie det staht mit em Fön            

 

Musiker

Din Radio gaht los es isch viertel ab sechsi                       

De Depp vo de Morgeshow versuecht wieder frech z’si                                   

Weg letscht Nacht plagt dich en hässliche Kater                       

Du schlucksch zwei Aspirin - trotzdem vergaht er nöd                       

 

Nach em Dusche gschnell en Kaffi, d’Nacht brennt i dine Auge

Häsch zwar kei Hunger -  verdrucksch trotzdem es Lauge-

-brötli und en Donut – muesch dringend uf d’Toilette

en guete Moment für die erscht Zigarette

 

Denn stahsch i de S-Bahn und gsehsch all die zerschtörte

Gsichter und weisch - eis devo ghört der

Du flüchtisch i d’ Welt vo de Gratisziitig

Um dich ume stinkts nach Schweiss – du wünschisch es wär Friitig            

                                               

genau i dem Moment dreih ich mich nomal um, find                                   

s’Chüssi und vergrab min Chopf gähnend drin                                               

Leg de Arm um mini Groupies – wo heisser als d’Klum sind                                               

ja so isch das halt - will ich Musiker bin                                               

 

Dini Auge nehmed immer meh so nen gäle Ton a

din Buuch fühlt sich wien en uufblasne Ballon a

Magsch chum meh uufstah – chasch di nüme konzentriere

Also chrüchsch zum Arzt – und zwar uuf allne Viere                       

 

Din Dokter luegt ernscht und verkündet d’Diagnose

s Blablabla mündet im Wort „Leberzirrhose“

er red vo drü Mönet und begründet d’ Prognose

mit em Mangel a Organ – und die täg mer nöd verlose

 

Natürli findsch es ungerecht und frägsch „Worum ich?“

All Kollege da in (Dietike) suffed doch glich vill

du kämpfsch und gisch nöd uuf, hoffsch uf Rettig i de Not                 

Aber es nützt der alles nüd, – du bisch tot

                                                     

Das isch de Moment wo min Chirurg a mis Bett tritt

mir en Plastikbütel zeigt mit ’re Läbere drin

Und ich bin wieder froh, dass es vo mir sonen Klon git

Und das isch nur de Fall – will ich Musiker bin

 

Es isch heiss da une, du tropfsch us allne Pore

Und irgendwie weisch, das Mal chunnsch nöd ungschore

devo - nei - das Mal wirsch büesse

und da staht er scho vor dir zum dich begrüesse:                       

 

„Willkomme i de Höll, min Name isch Satan

ich bin de einzig Engel, wo de Spagat chan

nach vorne und i d’Breiti, söll ders mal zeige?“

Natürli seisch „Ja“ will für es „Nei“ bisch z’feig

 

en Tüfel im Spagat – das gäb es super Foti

doch jetzt häsch andri Sorge will de Yoga-Freak wot di

au in Spagat zwinge, drum rissed dini Sehne

er lached luut und seit - „hetsch halt früener afa dehne!“                        

 

Du schreisch „Das isch nöd fair – ich ha nie gfluecht oder gloge!

Han mini Frau nie betroge und kei Stüüre hinterzoge!“

Er seit wenn d’ würkli glaube tegsch, dass d’ am falsche Ort segsch                       

Chönnsch en Aatrag stelle wenn d’ 1000 Jahr gschmort hegsch           

 

Das isch de Moment wo de Petrus eus d’Hand git                                   

Und eus willkomme heisst mit vill Nebel und Wind                                   

Mir sind nur uuf Bsuech da für en himmlische Uftritt                                   

Mir sind ja unsterblich will mir Musiker sind 

 

Aromat

Im Löie gits hüt Ghackets und Hörnli,
Älplermagrone und Wurst-Chäs-Salat
Im Chrüz gits hüt Brate und Nüdeli
Mit Rüebli oder Blattspinat

Stramm wie Soldate stönds 
i zwei Reihe im Chörbli sortiert
vorne sind d Zahstocher zwüsched
em Salz- und em Pfeffer platziert

Hine rechts staht s brune Maggi-Fläschli
Stolz wie de Schwingerkönig und nebedra
Het das gäll-grüene Dösli
e lüchtend roti Chappe a

S Chörbli heisst Ménage
und de Tragbügel, de isch
grad au de Ständer für d Spiischarte
wo suscht würd störe uf em Tisch

Im Löie gits hüt Ghackets und Hörnli, 
Älplermagrone und Wurst-Chäs-Salat
Und zu all dem passt wunderbar
Maggi und Aromat

Nebed dra hets en Behälter us Plastik
Det chömed d Bierdeckel dri
Und en gfaltete Karton uf em Tisch
wiist uf d Suuserziit hii

D Serviette sind vo Rivella
Und d Tischset irgend vomene Bier
A de Wand hanged d Fahne vom Turnverein
und Gweih vo tote Tier

Imne Halter chlemt de Blick
Und während s Frölein d Stange bringt
Ghörsch d Francine Jordi wo us alte Boxe
über Glück und Träne singt

Im Chrüüz gits hüt Brate mit Nudle
oder Wienerli mit Herdöpfelsalat
Und zu all dem passt wunderbar
Maggi und Aromat

Und am Stammtisch sticht de Buur
de König, s Ass und s Nell
und will die nächsti Rundi chunt
leereds d Gläser jetzt no schnell
und dänn redets über d Veräterin im Bundesrat
Und zu all dem passt wunderbar
Maggi und Aromat

Salz, Pfeffer, Zahstocher,
Maggi und Aromat
Stönd i de Menage 
uf jedem Tisch parat

Stramm wie Soldate i zwei Reihe
Sinds de Grössi na sortiert
Doch die Wuche isch Im Sterne
öppis Unfassbars passiert

S isch würkli nöd zum glaube
Aber wie mer sich im Dof verzellt
Het die Noi am Zischtigmittag
Nebeds Aromat - es Tabascofläschli gstellt

 

Stinkefinger

Da hät’s no Stuelgang a mim Finger           

Und ich merks erscht jetzt bim Chäsfondue!           

Villicht chunnts vom Hundezwinger            

Oder vo ’me trou du cul           

 

Das git’s doch susch nur in Italie           

Und bi eus da git mer acht           

Wer hät scho gern d’Händ voll Fäkalie           

Und sitzt mit Gäscht bim Fondueznacht                       

 

Oh Baby trust me Jesus loves you

Und er verstaht dich, will er weiss:

I de Unterhaltigsbranche

da bringsch es wiit mit Chäs und Scheiss

 

Ixi

isch es Papiernastüechli i de Wöschmaschine ine glandet – denn bi das ich gsi

wenn’s i de Chuchi no Spaghetti-Sauce-Sprützer a de Wand hät – denn bi das ich gsi

stinked d’Hörnli vo letscht Wuche usem Chüelschrank würklich übel – denn bi das ich gsi

und isch de Kaffisatz im Zürisack statt im grüene Bio-Chübel – denn bi das ich gsi

 

stönd mir beidi usebutzt parat und s’chunnt kein Babysitter – denn bi das ich gsi

sind dehei no alli Fenschter off und s’chunnt es gruusigs Gwitter – denn bi das ich gsi

staht de Nachber i de Tür, will mir di ganz Nacht nur tönd stritte – denn bi das ich gsi

und hät bim Butter, – statt vo vorne, – öpper a de Sitte gschnitte – denn bi das ich gsi

 

isch d’Rechnig vo de Telekom jetzt plötzlich drü mol türer – denn bi das ich gsi

isch noch wuchelangem Sueche d’Fernbedienig zmal im Gfrürer – denn bi das ich gsi

fehlt de Deckel vo de Elmex gopferdeckel uf de Paschte – denn bi das ich gsi

hült um Mitternacht verzwiflet üsi Chli im Chleiderchaschte – denn bi das ich gsi

 

wenn du de Dr. House verpassisch und e Luus findsch i dim Kamm

e Grippe dich verwütscht und du keis Ticket häsch im Tram

wenn du s’Portemonnaie vergissisch und din Code bim Bancomat

und’s wieder Wiehnacht wird und du häsch no keis einzigs Gschenk parat

 

wenn en Airbus explodiert und s’git en Stau uf de A2

wenn de Stromboli usbricht und Bürgerchrieg i de Türkei

wenn de Christian bim Fondue wieder d’Händ voll Gagi hät

und vor din’re Huustür staht jetz doch es Minarett

– denn bi das ich gsi

 

Keine

Keine vo ois                                               

Keine vo ois drü                                   

Keine vo ois drü da                                               

Keine vo ois drü da obe                                   

Er nöd, er nöd, ich nöd                                   

Keine vo ois                                                           

 

Keine vo ois

würkli keine vo ois drü

Keine vo ois drü da

Keine vo ois drü da obe

Er nöd (ich nöd) er nöd (ich nöd)             

und ich nöd (au er nöd)

Also fräg nöd, fräg nöd, bitte fräg nöd           

Will keine vo ois                                               

Heisst Heinz

 

Hüt Abig 

Ich glaube hüt Aabig lueg ich wiedermal bi dir verbii

D’Tür isch scho offe, du chunsch mer entgege und

strecksch mer dini Hand hi

Und den frägsch wie’s mer gaht und ich säg eifach „Guet“

Was ja eigentlich stimmt obwohl’s mängisch weh tuet

Und denn holsch mer es Glas und mer setzted eus hi

Du i din Sässel, ich uf d’ Couch vis-a-vis

Ja ich glaube hüt Aabig lueg ich wiedermal bi dir verbii

 

Ich glaube hüt Aabig lueg ich wiedermal bi dir verbii

Und wie immer han ich es paar vo mine neue Lieder debii

Ich la der si lauffe, und bi ganz uufgregt

Will sich i dim Gsicht bim Lose nüd regt

Und denn erchlärsch mer, was all’s andersch müesst si

Aber stolz bisch insgeheim scho au e chli

Ja ich glaube hüt Aabig lueg ich wiedermal bi dir verbii

 

Ich glaube hüt Aabig lueg ich wiedermal bi dir verbii

Und ich tuen eifach so als wärsch du no da, als wär de Abschied nie gsi

Mir diskutiered wie immer und sind eus nöd einig

Politik oder Fuessball - e komplett andri Meinig

Nebeddra lauft de Fernseh - das stört mi e chli

Doch ich säge nüd, will i immer no de Sohn bi

Ja ich glaube hüt Aabig lueg ich wiedermal bi dir verbii

 

Sihlsee 

Züri versuft - überall hets Wasser                                                                       

Wie bim ne Tsunami - nume no vill krasser                                                           

D Fluetwelle isch wuchtig dur s ganze Sihltal abe                                               

Und het schliesslich ”Downtown Switzerland” under sich begrabe                       

Bim Bahnhofplatz stauet sich jetzt Trümmer und Schlamm

Am Platzspitz triibed Baumstämm, zwüsched Autos und Tram

D Seepolizei suecht am Löieplatz nach Mensche i de Not

Und Gaffer paddlet dur d Bahnhofstrass i ihrne Gummiboot

Schaufenster-Puppe schwümmed zwüsched Chleider, Stüehl und Tisch

Und am Buffet im HILTL bedienet sich di erschte Fisch

Am Paradeplatz plünderet Taucher Schmuckgschäft und Banke

Und am Limmatquai isch s Zwingli-Denkmal bedenklich am wanke

 

Züri versuft - überall hets Wasser

Wie bim ne Tsunami - nume no vill krasser

Sit Stunde hüüled d Sirene weg em Staudamm-Bruch bim Sihlsee

Und alli alli fräged sich wie het das nume chöne gscheh?

                                                                                                                    

Tagelang hets gregnet und de Pegel de isch vorher scho                                    

wegem Schnee wo gschmulze isch gfährlich näch an Grenzwert cho          

En Erdrutsch hets denn au no gäh, s isch würkli öppis los gsii                                   

Und de Druck uf d Staumuur isch denn offesichtlich z groß gsii                                   

Zersch hets nur chli tröpflet, bevor s dann plötzlich klöpft het

bim Hauptventil im Dammsektor 22 C

Im Kontrollrum hets zwar blinket aber niemmer (niemmer) het das gseh

Und alli, (alli) fräged sich, wie het das  chöne gscheh?

 

D Ufsicht im Kontrollruum hät de Marcel W. gha

Doch de isch nöd vor Ort gsii und het s Blinke drum nöd gseh gha

Sit re Stund scho isch er schier gstorbe uf em WC

Und alli (alli) fräged sich wie het das chöne gscheh?

De Marcel W. isch vor de Schicht go esse in Sterne

Und er tuet i sini Suppe halt immer gern-e

Halbi Fläsche Maggi dri, doch das Mal - du weisch wieso

Het er us de Menage statt em Maggi - Tabasco  gno

 

Züri versuft - überall hets Wasser

Wie nachme Tsunami nume no vill krasser

D Fluetwelle het Züri gnadelos verschlunge

D Stadt isch menschleer, d Sirene sind verklunge

 

 

88-102-69

88

Mini Fründin wird am Sunntig 88i

Ich hanere e Rüebliturte gmacht

Wenn sie die gseht denn isch sie glücklich - ja denn lacht sie

Und denn lömmer d’Fetze flüge die ganz Nacht

 

Sie fesslet mini Händ mit ihrne Stützstrümpf as Bett

Und denn biisst sie mich mit ihr’ne dritte Zäh is Bei

Denn sitzt sie uf mich ufe und schlüpf us em Korsett

Und all’s won ich cha säge isch „eieiei!“

 

Für mini Libido sind Runzle die bescht Nahrig

Gaht’s um d’ Paarig – setz ich uf Erfahrig

 

102

Mini ander Fründin die isch 102

Und villeicht händ ihr jetzt es Vorurteil parat

Wenn das so isch denn säg ich numme „eieiei“

Ihr händ ja kein Ahnig was eu entgaht

 

Sit de 1930er Jahr weiss sie wie mer verfüehrt

Sie kennt Tricks und Kniff us meh als 8 Jahrzehnt – juhee!

Und wenn sie mich mit ihrne Zitterhänd berüehrt

Denn isch es jedes Mal um mich gscheh –yeah-yeah

 

Für mini Libido sind Runzle die bescht Nahrig

Gaht’s um d’ Paarig – setz ich uf Erfahrig

 

69

Mini neu Fründin isch erscht 69i

und obwohl ich gar nöd uf so jungs Gmües stah

Hät sie mich verfüehrt - das isch mis grosse Pech gsi

Will die andre zwei händ mich wäg dem verlaa

 

Jetzt muess ich mich mit so me ne Sixteeny ume schla

Und die guete alte Ziite sind verbii – oh je

Und wenn sie meint a ihr’ne 69 müesst ich gnueg ha

Säg ich nume „Schätzli ich bruch meh meh meh!“

 

Für mini Libido sind Runzle die bescht Nahrig

Gaht’s um d’ Paarig – setz ich uf Erfahrig

Für mini Libido sind Runzle s’ beschti Fuetter

Ich bruch im Bett – ä Ururgrossmuetter

  

Endli senil

Ich stell d’ Tasse z’rugg uufs Tablett will sie leer isch            

 Ich ha nur gmeint sie segi leer, jetzt tropft de Kaffi uuf mis Pijama            

und uf em Lintuech wachst en dunkelbrune Mond                                    

Ich glaub ich druck jetzt gschider mal uuf de Chnopf da obe a mim Bett            

Au wenns müehsam isch, und mir de Schweiss uusbricht –                       

ich druck jetzt uf dem Chnopf                       

Wo d’Schwöschter endli chunnt streck ich ihre min Arm entgege            

und sege „Mami, es isch mer öpis abegheit“                       

Sie nimmt lächeln mini Hand und erchlärt,

sie heissi Swetlana und seig nöd mini Frau und au

das mit em Kaffi seigi nöd so schlimm

Denn hilft si mir uuf d’Bei und setzt mi i de Stuehl mit de

Redli unedra wo immer neb de WC-Tür staht

Jetzt fahrt sie mit mir is Bad im 2.Stock

Und ich schimpfe weg de Schwelle, wo sie eifach drüber ihne rollt                       

                       

Endli senil, endli senil!                       

Über d’Jugend flueche – und d’Brülle sueche                       

Endli senil, endli senil!                       

De ganz Tag umeligge – und s Personal afigge                       

Endli senil                       

 

Sis Züg im Heim verstreue – bim Esse nie meh cheue                       

Mit Assugrin drin bstelle – und vom Chrieg verzelle                       

De Rollator schlisse – und bim Jasse bschisse

Am Kurt is Hörgrät klatsche - und d' Schwöschter Ruth begrapsche

(de) XY wähle – und s’ Pissoir au verfehle

Vill Geld ha zum Vererbe – und ewig lang nöd sterbe

Alles 2x säge – alles 2x säge

 

Ich stell d’ Tasse z’rugg uufs Tablett will sie leer isch            

Ich ha nur gmeint sie segi leer, jetzt tropft de Kaffi uuf mis Pijama            

und uf em Lintuech wachst en dunkelbrune Mond 

 

Frosch 

Oh Baby, Oh Baby           

Du häsch würkli alles, was ä Traumfrau sötti ha           

Dini Auge, dini Lippe, dini Haar, dini Figur -

alles Handelsnorm 1A

Au din Charakter – beidruckt mich extrem           

Drum bitte erchlär mir jetzt mal – was isch dis Problem?           

           

Oh Baby,

Mit dim umwerfende Lächle chunsch du sicher jede

über din Wert uf em Single-Märt müend mir bestimmt nöd rede

Du bisch de Hauptpriis, lueg di doch mal a-

-also erchlär mers bitte endli, ich chans nöd verstah:

 

Was macht de Frosch da nebed dir?           

Was macht de Frosch da nebed dir?           

Tue nöd als öb d’s nöd wüssisch           

Au wenn d’ de 50 mal küssisch:           

Das blibt en Frosch da nebed dir!           

 

Oh Baby

Villicht häsch di ja für innri Wert entschide

Doch i dem spezielle Fall glaub ich meh an es Augeliide

Kapitalismus – chönnt au d’ Erchlärig sii

Stimmed d’ Finanze scho gnüsst so en Ranze alli Sympathie

 

Oh Baby bis vor Churzem häsch du            

so nen guete Gschmack gha           

Und jetzt ersetzisch mich tatsächlich dur de alti Sack da

Gell für d’Karriere nimmsch fängs jede Primat

Aber wenn de dich alangt sehnsch di nach em Amphibie-Zölibat           

 

Was macht de Frosch da nebed dir?           

Was macht de Frosch da nebed dir?           

Tue nöd als öb d’s nöd wüssisch           

Au wenn d’ de 50 mal küssisch:           

Das blibt en Frosch da nebed dir!           

           

Was macht de Frosch da nebed dir?           

Was macht de Frosch da nebed dir?           

Au wenn d’ en Chopfstand uffüersch           

Oder de Typ a d’ Wand rüersch           

Das blibt en Frosch da nebed dir!           

Gib’s zue:           

Du träumsch jedi Nacht vo mir!

 

Füürpolizei

Mir hetted eu hüt gern uf e Reis mit gno           

Und die Bühne da schön belüchte la

Doch de Johnny vom Hechtplatz de het gseit

Es teg em leid – wills nöd meh vertreit –

weg de Obrigkeit vo de           

 

Füürpolizei – Füürpolizei           

S’ Liecht isch zum Schreie – weg de Füürpolizei            

 

Mir hettet eu au gern mit Kläng verwöhnt

Dass eu d’ Herz uuf gönd – und d’Haar am Arm uufstönd

Mir hetted eusi High-End-Boxe installiert

Doch sie händ insistiert - und eus informiert –

das werd nöd akzeptiert vo de

 

Füürpolizei – Füürpolizei

De Sound isch en Brei – weg de Füürpolizei

 

Natürli het ich dich gern zu mir hei gno

Und du weisch ja scho, wie das wär usecho:

Ich heti dich – so wied’s bruuchsch - die ganzi Nacht

Glücklich gmacht – het dis Füür entfacht

Doch in Anbetracht vo de

 

Füürpolizei – Füürpolizei           

Gang ich ellei zu mir hei            

 

Kei Pyro-Effekt (weg de Füürpolizei)           

Kei explodierendi Objekt (weg de Füürpolizei)           

Ich han keis Zündhölzli azündt (weg de Füürpolizei)           

Will zeusle isch e Sünd (luut Füürpolizei)           

 

Kei Tabasco uf em Tisch (weg de Füürpolizei)

Kei Brandstifter vom Frisch (weg de Füürpolizei)

Ich verdamme sie! (d’ Füürpolizei)

Cha nöd Füür und Flamme sii (weg de Füürpolizei)

 

Kenn Funke wo (hüt) springt (weg de Füürpolizei) 

Ke zündendi Idee wo’s bringt (Füürpolizei)

Nume abglöschti Lüüt (weg de Füürpolizei)

Und us eus zwei wird nüüt (nur weg de Füürpolizei)

           

Aber öppis macht mich stutzig und zwar immer meh:

Niemmerd hät je - en Füürbull gseh!

Egal wien ich’s wende oder wien ichs dreh

Für das chas eh – nur ei Erchlärig geh – oh yeah:  Es git kei           

           

Füürpolizei – Füürpolizei           

Alles nur fuuli Uusrede – hey! – es git kei           

Füürpolizei – Füürpolizei... trotzem:

De Platz bliibt frei, weg de Füürpolizei   

 

Mehrzahl

Es git Lüt die nehmed mich offebar           

Mindeschtens als zwei Persone wahr           

Sie spreched mich drum nöd nur hie und da           

Sondern ständig i de Mehrzahl a           

 

Sie säged „Münder villicht susch no öppis ha?“              

Au wenn i ganz ellei im Lade ine stah           

Sie fräged „Hätted’er gern no bitzli meh?“           

Obwohl ich usser mir am Trese niemmer gseh           

 

Au uf de Post händs mini Gspalteheit wahr gno           

Und gseit „Ihr chönd’s am Abig go abhole cho“           

Und bim „Eui Brems isch futsch“ han ich endteckt           

Dass im Velomech en Psychiater steckt            

 

Weg min’re offesichtliche Schizophrenie           

Bini denn bim echte Seeleklempner gsi           

Und de het gmeint das seigi – abgseh vo de Schueh           

Völlig normal und heig mit min’re Arbet z’tue           

 

Das isch normal – das isch normal – mal abgseh villicht vo de Schueh

Das isch normal – das isch normal - und hät mit minre Arbet z’tue

 

Dass ich da nöd selber druf cho bi:           

Die Mehrzahlschnurris wend doch nume höflich sii           

Wie bim Papscht oder bi de Königin           

Händ’s au bi mir de majestätisch Plural drin           

Ja wie bim Papscht oder bi de Königin           

Will sie wüssed, das ich Musiker bin!

 

Verbii

Oktoberlaub seit dir „muesch gah!“

Du leisch die warmi Jagge a

Es isch en schöne Summer gsi

Verbii, verbii, verbii

 

D’ Sunnebrülle chunnt in Schrank

I’m Chäller fülleds dir de Tank

Wend hei chunnsch dunklets au scho ii

Verbii, verbii, verbii

 

Und wenn’s dir jetzt au z’chalt wird da

Denn gib mer d’Hand und lan eus ga

Sing mit mir, bis d’nüme frürsch

Ich hoffe dass du gspürsch:

Es gaht mer glich

Und das Lied isch für dich

 

Das Post-it  wo sit Aafangs Mai

verkündet du chämsch später hei

„später“ isch glaub längschtens gsi

Verbii, verbii, verbii

 

Das Chüssi won ich nie meh wäsch

Sit du s letsch Mal druf gschlafe häsch

au dini Palme welkt scho chli

Verbii, verbii, verbii

 

Und wenn du mal nöd sicher bisch

Öb das so würkli richtig isch

Will d’ eusi ganz Gschicht bi der treisch

Denn hoff ich dass du weisch

Es gaht mer glich

Und das Lied isch für dich

 

AIm Saal gönd jetzt denn d’Liechter aa

S’Theater leert sich nadisna

de Gögs packt euses Mischpult ii –

Verbii, verbii, verbii

 

Und wenn d’hüt z’Nacht nöd schlafe chasch

Will d’irgendwo am Berg a stasch

wenn d’ nüd meh weisch wo reimt uf „ich“

Denn glaub mer, s gaht mer glich           

Und das Lied, ja das Lied isch für dich

 

verbii, verbii, verbii

verbii, verbii, verbii 

De letschti Celloton verklingt

Nur de Chor wo wiitersingt

En letschte Refrain, dass isch’s gsii - Verbii, verbii verbii