Lieder aus der Vogelpespektive - Texte

Eifach

Hey zum Glück isch alles e so eifach
Hey zum Glück isch alles klar
Mueschs nur genau so mache wies der gseit wird
Denn bestaht au gar kei kei Gfahr

Und wenn's der z'chalt isch, denn muesch halt links go trülle
Zur Sicherheit händs det en rote Punkt hi gmacht
Und falls du nöd merksch, wenn's mal richtig luschtig isch
Hät's es Band wo für dich lacht

Hey zum Glück isch alles e so eifach
Hey zum Glück isch alles klar
Mueschs nur so mache wies i dem Heft staht
Denn klappt alles wunderbar

Und falls din Body i de Badi nöd chasch zeige
Gits 7 Üebige und Trennchoscht-Diät
Und wenn du findsch din Fründ lös dich vill z'vill eleige
Hät d'Elian sicher en Rat

Hey zum Glück isch alles e so eifach
zum Glück chasch di druuf verlaa
Muesch nume d'Packigsbilag gnau durelese
Oder din Arzt go fräge ga

Und wenn di s'Gwüsse plagt, schicksch alti Schueh nach Bukarescht
Und wenn's der stinkt, zündsch e Duftcherze a
Und wenn d' nöd wotsch dass' peinlich isch, wenn d' Buuchfrei a ne Party gasch
muesch halt din Nabel pierce la
denn dörfs au useschwable da!

Hey zum Glück -isch alles e so eifach
Hey zum Glück lauft alles rund
Muesch nume s richtig Feld achrüzle
Damits au wiiterhin guet chunnt

Und falls kei Ziit häsch, zum alles durelese
Händs für dich extra Parole usegeh
Wo dir helfed dich für "Nei" z'entscheide
Oder de Gegevorschlag z'neh

Hey zum Glück isch alles e so eifach
Ja das gseht doch jedes Chind
Welli dass öis nur muetig düend beschütze
Und welles dass die Böse sind

Thank God, everything's so easy
Gott sei Dank isch alles so klar
Es isch so eifach, dass' sogar im Fernseh chunnt
Und drum isch's todsicher au

Gueti Siite

Jede Mensch hät sini guete Siite
Muesch si nume welle gseh
Jede Mensch hät sini guete Siite
Muesch si nur go sueche

Jede Mensch hät sini guete Siite
muesch em nur e Chance geh
Jede Mensch hät sini guete Siite
Muesch si nur go sueche ga

Er quetscht sich dur d' Reihe, wenn de Vorspann lauft
hät di gröschti Popcorn-Tüte kauft
Untermalt de Film mit allerlei Essensgrüsch
Schriibt mit de freie Hand no gschwind es SMS
Tuet als ob ihn d Story völlig chalt läss
Und informiert ois jedes Mal wänn er ahnt wer dä Mörder isch

Jede Mensch...

Mit em randvolle Ikaufsswägeli
Stellt sie sich a de Expresskasse hi
Tuet als nähm sie all die böse Blick nöd wahr
Leit die ungwogne Fenchel uufs Kassierband
Nimmt ihres gsammlet Münz i d' Hand
Zallt de Migrossack mit de Charte und alles ander bar

Jede Mensch...

Du lütisch mir bim Znacht esse aa....

Umfrag

Schöne guete Abig hätted sie villicht gschwind
Ziit für e chlini Umfrag; ihri Agabe sind
Bi eus mit Garantie in allerbeschte Händ?

Ja wunderbar, i dem Fall z'erscht zu ihrer Person:
Wie oft rasiered sie sich und langet ihre Lohn
Für d'Mieti und's Auto und's Mobiltelephon?

Haltet sie mit em Velo immer a bi rot?
Glaubt in ihrem Huushalt öper an es Lebe nach em Tod?
Essed sie lieber wisses oder Vollkornbrot?

Wie hoch isch ihri Prämie und bi well're Chrankekasse?
Händ sie s'Gfühl de Christoph heig no alli Tasse
im Schrank? Und gänd sie mängisch d'Farb nöd a bim Jasse?

Findet sie dass mer Wiehnachte abschaffe söll?
Gits öpis vom Tucholsky in ihrem Büechergstell?
Glaubet sie s'Zölibat macht Homosexuell?

Isch euses Universum nur eis vo villne?
Hät d'Ziit en Aafang gha?
Söt mer mit Durchfall gschider kenn Furz fahre laa?

Schöne guete Abig hätted sie villicht gschwind
Ziit für e chlini Umfrag; ihri Agabe sind
Bi eus mit Garantie in allerbeschte Händ

Feriefilm

Schön dass mir spontan uf dich därfed zelle
Kei Ahnig wer mer suscht hätted afräge söllä
Schön dass mir dank dir chönd i d'Ferie ga
Zum Glück chammer sich uf dich no verla

Und s Chatzefuetter liit det grad näbed de Zwüschewand
und uf em Balkon findsch zwei grossi Säck mit Chatzesand
gisch 2 mal täglich wenn's drinn liit, es sötti lange für diä Ziit
Und wenns nöd langet gasch go poschte, dä Coop isch ja nöd wiit ä weg...

...simmer übrigens nöd nur bis zum Wuchenend
Will mer 10 Täg später en direkte Rückflug händ
Drum hät e mer gern en Plan gmacht, wie du d'Pflanze sötisch pflege
S'isch leider nüm dringläge, wäge dem müen mer s der säge:

Gib em Kaktus nöd z'vill Wasser, de isch bim Noldi schier abglege
Und em Bonsai mal chli Vitaplant, da hät er nüd degege
Nimmsch d'Sprützchanne bi de Stäge und denk dra bi ganz vill Räge
Sötsch de Hanf uf oisem Balkon schnell i d'Stube ine träge

Schön dass mir spontan uf dich därfed zelle
Kei Ahnig wer mir suscht hätted afräge söllä
Schön, dass mir dank dir chönd i d'Ferie ga
Zum Glück chammer sich uf dich no verla

Und d' Post leisch eifach i mim Büro hine uf de Sekretär
Und meldsch di sofort wenn e Handligsvollmacht drunter wär
Weisch weg dem Huus in Agadir und s Tagblatt tuesch zum Altpapier
Wäg dere Tür meldet sich denn irgendwenn de Wipf bi dir

Muesch halt luege wäg de Fuege hät er gseit er chöm verbii
Luegsch em bitte chli uf d Finger und seisch em s göng uf d'Garantie
Ich glaub jetzt hämmers denn so langsam, oder isch no öppis gsi?
Nei, nei, ich glaube nöd - ah mol, jetzt fallts mer i

Am Suntig chunt normalerwis sini Muetter da go ässe
Ich han zwar gseit mir seged weg, aber villicht häts sies ja vergässe
machsch re eifach schnell e Tasse Kafi hämmer ja no masse-
haft und Guetzli au - und sie tuet schampar gern jasse

Schön dass mir spontan uf dich därfed zelle
Kei Ahnig wer mir suscht hätted afräge söllä
Schön, dass mir dank dir chönd i d'Ferie ga
Zum Glück chammer sich uf dich no verla

Und de da isch für d' Wohnig, und für d Poscht isch de chli
Und falls mal öpis wär isch de für d'Garage au debii
Da isch d Nummere vom Hotel, für de allerschlimmschti Fall
Und susch melded mir eus ja sowiso e mal

Schön dass mir spontan uuf dich därfed zelle
Mir chönd nöd verstah wiso de Urs nüm hät welle
Und d' Alice, de Noldi und au d'Melanie
Defür laded mir dich zum Nachtesse i
Und gell, wenn du wotsch chasch de Paul ruig mitnäh
Und als Höhepunkt zeiged mir eu denn eusä:
Feriefilm

Euse Obergeili superkrassi vollverschärfti total cooli Feriefilm

Euse Obergeili superkrassi vollverschärfti total cooli Feriefilm
Schonigslosi ganz privati und nöd ganz jugendfreii Feriefilm

Euse Obergeili superkrassi vollverschärfti total cooli
Schonigslosi ganz privati und nöd ganz jugendfreii
Digitali ungschnittni und nanig navertonti Feriefilm

Euse kunschtvolli Feriefim
Euse endlosi Feriefilm

Da obe

Will die Stüehl wo mir da händ sind extra so konzipiert
Dass mer zwei Stund druf cha sitze ohni dass s'Gsäss kolabiert
Und geg vorne chönd mir eusi Bei so wit strecke wie mer wänd
Vo all dem chönd ihr nur träume wo Iitritt zallt händ

Ja da obe sitzt mer gottseidank zwei Meter usenand
Und au wenn er da nebed dra nöd dusched hät bin ich im Stand
De Abig chönne z'gnüsse will ich mit eu fühl und weiss
Wies isch da une zwüsched Mundgruch Fuess- und Achselschweiss

Und die hinder dir lacht lut ab jedem no so blöde Scherz
Oder singt de Refrain mit, verschobe um e Terz
Und de vor dir spillt wahrschinli Profibasketball
Weg all dem lueg ich vill lieber obenabe klare Fall

Ja es isch wahr, es isch en Gnuss da uf de Bühni obe z'sitze
Trotz Schiiwerfer wo eim blended und em permanente Schwitze
Trotz Versägensängscht und Herzchlopfe isch's vill di chlinner Qual
Als da unde müesse z'hocke, im Theatersaal
Als da unde müesse z'hocke, im Theatersaal
Und übrigens die Socke sind früsch gwäsche gopf nomal!

Andersch

Ich bin eigentli ganz andersch
Doch ich weiss das dich das stört
Ich bin eigentli ganz andersch
Und du denksch dass sich das nöd ghört

Wege mir, muesch du kenn Wecker stelle
Wege mir, muesch s Usegeld nöd zelle
wege mir, muesch mis Mami nöd verstah

Ich bin eigentli ganz andersch
Ganz andersch als es schiine tuet
Ich bin eigentli ganz andersch
Und trotzdem gahts mir mängisch guet

Wege mir, muesch d'Tür nöd zweimal gschlüsse
Wege mir, chasch d'Mahnig au verrisse
Wege mir, muesch vo Golf kei Ahnig ha

Ich bin eigentli ganz andersch
Und es tuet mer au nöd leid
Ich bin eigentli ganz andersch
Und ha nie öpis anders gseit

Wäge mir, muesch das Glas nöd Abwäsche
Wäge mir, bruschsch nöd nomal e Täsche
Wäge mir, chasch ruhig ellei go tanz gah

Wäge mir
Wäge mir muesch nöd immer befelle
Wäge mir muesch nöd so vill verzellä
Hans doch gar nöd so gnau wüsse welle
blabla...

Ich bin eigentli ganz andersch (Er isch eigentli ganz andersch)
Und ich chan doch nüd defür (Er isch eigentli ganz andersch)
Und obwohl ich so andersch bin
Lisch du da nebed mir
Oh yeah!

Häsch das glaubt?

Häsch das würkli glaubt uf dem Plakat
Und was det über Freiheit gschribe staht
Dass du denn en Cowboy bisch
Und dass' e mildi Sorte isch
Und sich drum es paar Jahr länger gnüsse laht

Häsch das würkli glaubt mit dem Ring
Und dass er eu für immer zäme bringt
Dass sie dir für immer ghört
Und denn nüd eues Glück stört
und dass du dich wirsch fühle wien en King

Chum hol mir lieber es Glas und schenk mir au mal i
Hol mir lieber es Gla-as
Ja hol mir lieber es Glas, ich wot au bsoffe si
Hol mir leber es Gla-as

Häsch das würkli glaubt mit dem Schwein
Wo denkt „hoffentli schmöck i au gnueg fein"
wo äs schöns Läbe hät dörfe ha
Und sich gern hät metzge la
Nach de Richtlinie vom Tierschutzverein

Häsch das würkli glaubt mit dene Bei
Wo so vill länger sind als die di hei
Und oberdra das Brett
natürli ohni eis Gramm Fett
Und sie luegt wie wenn's chönnt klappe mit eu zwei

Chum hol mir lieber es Glas und schenk mir au mal i
Hol mir lieber es Gla-as
Chum hol mir lieber es Glas, ich wot au bsoffe si
Hol mir lieber es Gla-as

Häsch das würkli glaubt mit dere Ziit
Dass sie all Wunde heilt und alls vergit
Dass d' gli nüme truurig bisch
Und kä Sorge me häsch
Und dass e gueti Zuekunft vor dir liit

Häsch das würkli glaubt mit dem Gott
Und dass er euses Gjammer ghöre wott
Und dass' ihn interessiert
Was mit em HCD (oder was au immer) passiert
Und er a dem Schlamassel Gschuld si sött

Chum hol mir lieber es Glas und schenk mir au mal i
Hol mir lieber es Gla-as
Chum hol mir lieber es Glas, ich wot au bsoffe si
Hol mir lieber es Gla-as

Chum hol mir lieber e chli Gras...

Denke

plötzlich wird`s still ich denk no und frog mich
was du jetzt grad denksch dass ich denk über dich
denn denk ich, au du denksch vilicht drüber no
was ich denke, dass du über mich denksch und so

wenn ich denk, du hebsch denkt was ich denk, dass du denkisch
denn denki, dass das um ein Egge z`viel denkt isch
keis Wort fallt, wo üs chönt vom Denke ablenke
au du denksch, ich heb denkt du denksch, was ich denke

ich studier, was du denksch dass ich jetzt chönti säge
mer schwiged bim Denke und s`macht üs verläge
vilicht goht`s der glich und au du überlaisch
was ich mer so denke dass du jetz denn saisch

grad jetzt, wo-n-ich denk dass das denke um d`Egge
jo eingentlich blöd isch und müehsam zum Tschegge
bisch du plötzlich weg und ich denk mer, ich hett
vilicht eifach gschider statt z`denke mol gredt

Eigentli

Aber eigentli han ich dich gar nie vermisst
Han sofort wieder es breits Lächle ghisst
Und endli wiedermal im stah uf de Rand pisst

Und ehrlich gseit bin i no froh bisch jetzt furt
niemmer meh wo mer i d' Sportschau driischnurrt
und nach jedem Game fräget wie lang dass' no duurt

Ehrlich gseit han ich's vill schöner ellei
Keis vorwurfsvolls „Säg mal, wenn chunnsch hüt z'Nacht hei?"
Und niemmer wo frägd „Finsch ich han z' dicki Bei?"
Und bis vorgeschter gseit hät s' seig perfekt mit eus zwei

Twix

ich kenn sie scho MARY LONG und au scho lang sind mer PERSIL
doch wo sie DU macht, jo, do machts i minre Hose PLAYMOBIL
sither isch s um mi PASSAIA und sie isch mis ODOL
chum sitzt sie vis-a-VISA scho bini STIMOROL
sit villne TAGI, sind da FACTS jo, sone BRUNETTE muesch zerscht FINDUS
ohni ZWEIFEL, jo, i WOZ sie isch einzig uf dem GLOBUS

ich ELMER vor, wärsch MINI ALPHA und ich wär din ROMEO
ich will mit der WALSER tanzend i di gross Welt USEGO
häsch so schöni OREL FÜESSLI ich will sie und will AUDI
und DU DARFST a MINI BALLY wenn ich dörf din HERO si
im HAPPY-BETT

uf d`Frog, öb sie chäm is NESTLE sait sie süess wie e MAESTRANI
um EDING wöll sie mi BATA und sie müess mich jetzt ARMANI
ESSO wöll sie kein KODAK, sait, ADIDASs ich sägi SBB
und ganz tüüf INTERIO do tuet mir das VW
ich säg, bitte, tue NOVARTIS lueg, vo JECKLIN do en GUTCHI
ich schenk dir no viel MERCEDES denn DISNEY mächt mi FUJI

ich ELMER vor, wärsch MINI ALPHA ... ...

du wörfsch ALDI SUNNTIGSBLICK und du DUSCH DAS OMEGA
und de ganzi WINTERTHUR scho bini DAEWOO di will ha
bini DAEWOO di will ha bini DAEWOO di will H & M

doch jetzt tuet sie plötzlich HAKLE will mit mir nöd VÖGELE
ich denk, villicht hät SIEMENS oder isch e TOFFIFEE
sie sait, „hey, wa SWATCH?" und „LÄKmEROL am ARIEL"
denn haut sie mer eis as TSCHIBO und isch sofort FORD ganz SHELL
so tröscht`mi mit de ANNABELL i MAXI MINI KLEENEX
und muess i QUICK mol LEISI denn TWIX i halt uf dBICCOFLEX
i MARS mit ELMEX - MILKY WAY
Ich TWIX uf dBICCOFLEX

Huuswart

Aaa - Mit dem Schriibe möchted mir d'Mieterschaft
wiedermal druf uufmerksam mache
dass Schue, Schirm und anderi Privatgägeständ
im Stägehuus nüd verlore händ
Dass d' IIfahrt vor de Garage kenn Fuessballplatz isch
Und d'Ablag i de Wöschchuchi kenn Wickeltisch
Dass mer de Velocheller nöd mit all dem Sperrmüll füllt
Und de Abfallsäck erscht am Morge a d'Strass füre stellt
Dass mer nach de 9ne d'Huustür zweimal gschlüsse tuet
Dass gilt au für d'Frau Mollet, susch lupfts mer de Huet

Aaa - Mit dem Schriibe möchted mir d'Mieterschaft
wiedermal druf uufmerksam mache
Dass' Grilliere uuf em Balkon d' Nachbarschaft stört
Und de Garteschluuch ganz ellei em Huuswart ghört
Dass Petfläsche nöd komposchtierbar sind
Und de Sandchaschte kes WC isch für Hünd oder Chind
Dass mer s Altpapier nöd eifach im Migrossack vor d' Türe stellt
Und de Wöschplan au für Studis und Albaner gilt
Vor de Briefchäschte därf mer kei Velo parkiere
Und bitte tüend s Gestöhne nach de 10ne reduziere

Ich hoffe dass isch jetzt s'letschtmal won ich eu das säge muess
Ich hoff das isch jetzt s letschtmal
(Telefon)
Ich hoff das isch jetzt s letschtmal
Ich hoff das isch jetzt s letschtmal
Ich hoffe dass isch jetzt s'letschtmal won ich eu das säge muess
Danke für's Verständnis und mit fründlichem Gruess

Hansueli

Ich will nöd per du si mit dir
Ich will nöd per duuuu si - mit dir
Ich will nöd per du si mit dir
Ich will nöd per duuuu si -

Nöd will ich bsunders vill uf Formsache gib
Nöd will ich finde vornehm tue seigi hip
Nöd will ich mkr din Name eh nöd merke cha
Und au nöd will i sowiso scho z'vill Fründe ha

Ich will nöd...

Nöd will d' uuf tätowierti Oberärm stahsch
Und im Kauflüüte i und uus gasch
Nöd will dich z'kenne scho peinlich gnueg isch
Und au nöd will du zue gisch dass du GC-Fan bisch

Ich will nöd...

Nöd will d' de ganzi Tag dummi Sprüch machsch
Und über dini Witz alls einzige lachsch
Nöd will d'en saublöde Schafseckel bisch
Schlicht und eifach will din Vorname "Hansueli" isch!

Will ich nöd per du si mit dir
Ich will nöd per duuu si - mit dir
Ich will nöd per du si mit dir
Je veux pas perdu si - mit dir

Madonna

Gestern ist sie mir endlich begegnet
Die gute fee die mir den Weg zu Glück und Reichtum ebnet
Sie sagte, ich hätte vier Wünsche frei
Natürlich fühlte ich mich verarscht, denn sonst sind's doch immer - fünf!

Ich hab kurz überlegt und wollte schon fast sagen
Alls erstes wünschte ich eintausend Wünsche mehr zu haben
Doch dann dacht' ich mir, das sei vielleicht zu frech
Und ohne lang zu zögern meinte ich:

Erstens hät' ich gerne J. Lopez im Bett
Zweitens denk ich auch mit Claudia Schiffer wär es nett
Drittens hät' ich's gern mit Nicole Kidman gemacht
Und dann gib mir noch Madonna für ne Nacht

Erstens hät' ich gerne J. Lopez im Bett
Zweitens denk ich auch mit Claudia Schiffer wär es nett
Drittens hät' ich's gern mit Nicole Kidman gemacht
Und dann gib mir noch Madonna für ne Nacht
Gib mir Maradona für ne Nacht!

Homestory

Hät's ächt mit mim Haarschnitt z'tue?
Oder fehlt mer s Outfit dezue?
Isch mini Nase dra gschuld
dass sich min gröschte Wunsch nöd erfüllt

Han ich z'vill Büggel im Gsicht?
Oder nöd s'ideal Gwicht?
Isch mini Badwanne z'chli
für e Home-Story i de SI.

Ich küsse de Von Rohr uufs Muul
Und rasier au mini Bei
Wie das den würkt isch egal
Hauptsach ihr chömed zu mir hei

Hät's ächt mit mim Haarschnitt z'tue?
(Nei nei, dini Haar sind e Pracht!)
Oder fählt mer s Outfit dezue?
(Du bisch für d' Frontsiite gmacht!)
Isch am End mini Nase dra gschuld?
(oh je)
dass sich de Traum nöd erfüllt
(oh jemine)
dass sich min Traum nöd erfüllt.

Traum

Schnuuf ganz tüüf i, und langsam uus und lueg die Wand a vor dir
Mach d' Auge zue und wieder uuf, isch als no glich wie vorher?
Fühl mal din Puls, und zell still mit was meinsch, isch das normal so?
Und gell die Stimm, die Melodie, die kennsch du doch, vo irgendwo!

Wie sicher bisch, das das wo du jetzt grad erlebsch nöd en Traum isch
Und d' eigentli i dim Bett lisch
Säg, wie sicher bisch?

Au wenn d' jetzt denksch dass du dir die Frag au scho gstellt häsch
Und uf dim Weg dahi bis jetzt all's wie immer gsi isch
Au wenn dir i dem Ruum nüd ussergwöhnlich vorchunnt
Und all die Lüt wo du da gsehsch offebar wie immer sind

Wie sicher bisch, das das wo du, jetzt grad erlebsch nöd en Traum isch
Und eigentli i dim Bett lisch
Säg, wie sicher bisch?

Und wenn d' verwachsch, woher weisch, dass d' jetzt wach bisch
und nöd nur träumsch, dass d' verwacht seigsch,
säg woher weisch, öb du das nöd nur träumsch?

Schnuuf ganz tüüf i, und langsam uus und lueg die Wand a vor dir
Mach d' Auge zue und wieder uuf, isch als no glich wie vorher?

mexiko

mi verschtand ha-n-ig verlore u mis härz, das fäut mir o
(si) beidi ligge am ne schtrand irgendwo in mexiko
i ma mi nüm so gnou erinnre i weiss es nüm, wie das isch cho
vielecht isch`s um liebi gange irgendwo in mexiko

das chönt jedem mou passiere was chani denn drfür
itz bini haut chli tumm u s`git nümme, wo-n-i gschpür

han aus eifach derte glo irgendwo in mexiko

wer ech bin, das weiss ig nümme velecht heiss ig büne hueber oder so
mi name ha-n-ig vergesse irgendwo in mexiko
mi verschtand u o mis härz sige itz bim fundbüro
es heb se eine gfunge irgendwo in mexiko

das chönt jedem mou passiere was chani denn drfür
itz bini haut chli tumm u s`git nümme, wo-n-i gschpür

han aus eifach derte glo irgendwo in mexiko
mis härz u mi verschtand si ufem fundbüro
irgendwo in mexiko

es git nünt me, wo mi plaget es git nünt me, wo mir weh tuet
ha kei härz u kei verschtand meh u so geit`s mir totau guet

han aus eifach derte lo irgendwo in mexiko
mis härz u mi verschtand die ghöre dert an schtrand
irgendwo in mexiko

Ich ha di Bern gha

Ich ha kei Heiweh nach de Berge
Nach de Schoggi und em Wii
Und male au kein Traum scharlachrot a

Ich ha nie welle Fischer sii und bi nöd
giggerig am Louenesee
und het im Summer 68 au nöd vill blöder ta

ich schänke dir au nöd mis Herz
Und bi kein Schwan so wiiss wie Schnee
Alles won ich für dich ha isch dä züridüütsch Refrain

Ich wott bi dir sii Baby, wenigstens hüt Znacht
Wott mit dir luege wo dass s'Liecht entstaht
Ich wott dich hebe bis de neui Tag erwacht
Und dich nüm' losla bis dass d' Sunne untergaht

Du lisch mit mir nöd zmitts im Chleefäld
Wie ne Venus wo vo Bümpliz chunt
Und Alperose chömed mir au nie in Sinn

Herrgott ich bruch keis Hörgrät
Und sorry, dass ich nöd din Teddybär chan sii
S isch nöd hie und jetzt und ich bin nöd wien ich bin

Ich stüür keis Ufo für ois zwei
chan keis französisches Müntschi gäh
alles won ich für dich ha isch nomal de gliich Refrain

Ich wott ...

Azelle Bölle schelle, sie hät de Sohn vom Pfarrer welle
Und nöd de Daneli vo Trueb wo uusgseht wienen Kasseschrank
Chunt sie wieder hei, gits ewigi Liebi für die zwei
Und Sex vom Morge bis am Abig, hinderem Kiosk und i de Bank
Piff, Paff, Puff, da reimt sich galub nüt druf
Aber du bisch ehr und redlich

Ich wott bi dir sii Baby, wenigstens zum Znacht
Wot luege wie die Raviolibüchs uufgaht
Ich wot dich hebe bis din Ehema uufwacht
Und dich nüm losla - bis er fluechend vor eus staht

Belpmoos Belpmoos, ich nime no en Campari Soda

Trückli

Hol mer s' silbrig Trückli und en grosse Abfallsack
Und hilf mer wenn ich alli Songs sortiere und verpack
Bring mer alli Lieder, die in Dur und die in Moll
Vo de Weichspüeler- Ballade bis zum Punk und Rock 'n' Roll

Und dä Song isch für die wo Froid dra händ
Und die Kläng nöd eifach so verklinge lönd

As Trückli chunnt es Schloss dra, de Abfallack wird guet verschnüert
S eini wird uf Rose bettet, s ander in Kontainer grüehrt
Und wenn d' jetzt no chli Ziit häsch, denn gib mir dini Hand
Dänn verstecked mir dä Schlüssel a oisem Palmestrand

Und dä Song isch für die wo Froid dra händ
Und die Kläng nöd eifach so verklinge lönd

Ja dä Song isch für all wo Frage händ
Wo sich nöd i 20 Minute kläre lönd

Danke dass d'au „Nei" seisch, und nöd bloss hinterher marschiersch
Dass d' nöd nur de suuber Herd gsehsch, dich au für d'Lümpe intressiersch
Du söllsch für immer wüsse, dass d' nöd elleige bisch
Drum chasch s' Trückli mit zu dir neh, wos in guete Hände isch

Und dä Song isch für oi wo zueglost händ
Wo extra wäge ois dahii cho sind
Und jetzt wahrschinli no e Zuegab wänd

Oder au nöd
Denn händ er gha
Isch eus doch glich
De Specht muess gah

Elena

Am Dunnschtig han ich sie s erscht mal gseh im Stägehuus
Und sie hät mir sogar d'Türe uufgmacht
Am gliche Abig no han ich an ihri Türe klopft
Und e Fläsche Prosecco mitbracht

Sie hät glächlet und hät gseit das seig zwar schampar nett
Aber villicht echli spaht am zwänzg ab elfi
Sie seigi müed vom zügle und müess ganz dringend is Bett
Ich glaub das chönnt es guets Zeiche si!

Am nächschte Morge bin i extra mit em Tram is Gschäft
Und han bi de Haltistell uuf sie gwartet
Das heisst ich ha mich hinder em Billetomat versteckt
Und bi denn grad no uf de glichi gstartet

Ich han gseit „Hey sonen Zuefall, dass ich dich triffe da"
Und han im gliiche Abteil Platz gno vis-a-vis
Sie het zum Fenschter usegluegt und d'Chopfhörer ine tah
Ich glaub das chönnt es guets Zeiche sii!

Am Sihlquai han i si gstupft und gseit ich chämi denn die Nacht
E chli früener als die letschti verbii
Sie hät gseit sie müessi lehre und au susch gäng is ganz schlecht
Ich glaub das chönnt es guets Zeiche si!

Ich bin denn a dem Abig grad nach em Länderspiel
Doch no gschnell bi ihre go achlopfe
Ich han sie gfrägt öb sie sich nöd au echli einsam fühl
Und öb sie well verbii cho uuf en Tropfe

Sie hät tüüf duregschnufed und gseit „Jetzt los mal zue"
Und ihri Stimm hät zitteret debi
„Ich fühl mich wohl ellei, bitte las mich endlich in Rue!"
Ich glaub das chönnt es guets Zeiche si!

Am Samschtig hät sie sich im Wöschplan i treit gha
Also hani d' Underhose det la ligge
Bim zämelegge han' sie gfrägt öb sie well is Kino ga
Sie hät gseit ich söll mich doch selber...

Denn hät sie d'Tür gschletzt und isch fluechend durs ganz Huus
grennt und ich natürli hindedri
Sie hät gschroue, sie halti das nüme länger uus
Ich glaub das chönnt es guets Zeiche si!

Ooh I need your love babe, guess you know it's true
Hope you need my love babe, just like I need you

Hüt Morge isch es Telephon vo de Verwaltig cho
Weg dem Garageplatz wo mich so intressieri
Die neu Mieterin heig d'Wohnig jetzt doch nöd übernoh
Es seig scho komisch was i Frauechöpf passieri
Es seig scho komisch was i Frauechöpf passieri
Jetzt wo das klappt hät lad ich sie mal zu me Bier i!
Yeah!

Vampir us Papier

En Vampir us Papier hät nöd nur Angscht vor em Füür
Er hät au susch es paar grossi Problem
Will wenn er bisse tuet chunnt er nie bis as Bluet
Und 's verchruglet em d'Eggzäh extrem

Und wenn er sich verwandlet, in e Fledermuus
Gseht das meh nach me missratne Papierflüger uus
Und wenn er sich zum Schlafe i d' Chischte dri leit
Wird er am Endi no bündlet a d' Strass füre treit
De Vampir us Papier

En Vampir us Papier hät nöd nur Angscht vor em Füür
Er hät au susch es paar grossi Problem

Därf mer das?

Därf mer mit em Migrosack in Coop go poschte gah?
Oder im Tram neb öpper sitze wenn all's leer isch vorne dra?
Därf mer vo de Pizza de ganzi Rand im Teller ligge la?
Ich glaub das derf mer nöd und da halt ich mich au dra!

Derf mer wenn mer gfrägt wird würkli säge wies eim gaht?
Und uf d'Frag „Hey was denksch grad" antworte das seig privat?
Därf mer a de Swinger-Party uf em "Sie" bestah
Ich glaub das derf mer nöd und da halt ich mich au dra!

Derf mer bi „Titanic" luut lache ganz am Schluss?
Oder bim Bergrüesse säge: „Für mich bitte kenn Kuss"?
Derf mer sin Gagi au usswärts luut i d' Schüssle plumpse laa?
Ich glaub das derf mer nöd und da halt ich mich au dra!

Derf mer zun 're Schwangre säge „Grüezi mintenand"?
Isch das keis Problem usser mer schüttlet beidne d'Hand?
Derf mer mit so blöde Witz uufs Publikum losgah?
Ich glaub das derf mer nöd und da halt ich mich au dra!

Därf mer da in........... rede wiemmer wott?
So mit chotze, schisse, figge und läschtere über Gott?
Därf mer säge „Ihr sind selber Gschuld, wenn er Zuegabe wänd ha"
Ich glaub das derf mer nöd und da halt ich mich au dra!
Ich glaub das derf mer nöd und da halt ich mich au dra!
Ich glaub das derf mer nöd und da halt ich mich au dra!
Ich glaub das derf mer nöd und jetzt muess i mini Flööte ha

Level 1

Bis froh isch das erscht Level One und es isch nume das eint Spiel futsch
Wirf eifach no en Jeton nah, wenn d's nomal versueche wotsch

De Asatz isch ja würkli nöd schlecht gsi
Und dis Konzept het sicher Zuekunft gha
Mit dere Sunne im Zentrum und de Planete wo um si chreised ussedra

Au d' Idee mit em Wasser und de Zelle wo sich teiled
Het bestimmt nöd jede gha
Und das mit em Suurstoff und de Lunge dezue würd ich uf all Fäll patentiere la

Aber irgendwo zwüsched Alge und Ozonloch
Zwüsched Rose und Gentechnik
Zwüsched Plankton und Ölpescht
Zwüsched Delphin und Schleppnetz
Zwüsched Schwalbe und Tierfabrik

Irgendwo zwüsched Birke und Birkenau
Zwüsched Spitzmuus und Hiroshima
Irgendwo det zwüscheddrin isch öppis i d' Hose
wies chum schlimmer chönnt i d' Hose gah!

Bis froh isch das erscht Level One und es isch nume eis das eint Spiel futsch
Wirf eifach no en Jeton nah, wenn d's nomal versueche wotsch
Wirf eifach no en Jeton nah

Lieder aus der Vogelpespektive - Texte

Ich ha di Bern gha

termine

aktuell

Bilder