Tierisch
en Esel, e Chue, e Sau und e Chatz
gumped wie Frösch uf em Bundeshuusplatz
d`Chatz nimmt en Satz und de Esel grad au
d`Chue macht`s ne na und isch schtolz wie `nen Pfau
d`Sau selber isch lahm wie`nen Schnegg und sie chunnt
scho noch zwei Frosch-Hüpfer voll uf de Hund
„E Sau cha halt nöd immer nume Schwein ha",
sait de Esel und lacht und macht saublöd i-aa
das fuchst d`Sau und sie sait zum Esel: „Du, Chue!"
druf sait d`Chue zur Sau: „Blöde Aff, gib mol Rueh!"
do plötzlich sait s`Büsi: „Exgüse, miau,
dass de Esel e Chue isch, find ich im Fall au!"
jetz wehrt sich de Esel: „Ich bi doch kei Chue!
Die Chatz isch e Sau und e blödi dezue!"
„Jetz langet`s", sait d`Sau und d`Chue, die sait: „Muh,
jede wär gern de Chef, doch mir händ kän Guru."
„Ihr händ doch en Vogel!", rüeft d`Chatz druf und so
schtriitet Sau, Chatz und Esel wie d`Affe im Zoo
nur d`Chue wird ganz schtill und im Gsicht grüen und blau
und macht plötzlich d`Sau, d`Chatz und de Esel zur Sau
de Gschider git nah und de Esel blibt stah
das sait me, doch s`schtimmt nöd, nur d`Chue lebt jetz na
ich weiss, dass du über d`Moral schtuune wirsch:
wenn wie d`Chue all zur Sau machsch, denn bisch du de Hirsch
jetz weisch, wie de Has lauft, nur ei Frag blibt no
müesst nöd no öppis Politischs vorcho
warum susch schpillt die Gschicht uf em Bundeshuusplatz
doch das jetz i eim Satz no z`kläre, wär tierisch für d`Chatz
